تجربة مرعبة مع الجاثوم

مره وانا نايم فوقت كده من النوم وبتقلب عادي يعني ف المهم بعد متقلبت والدنيا زي الفل لاقيت حاجه كده شبه الفار ، رأس فأر بس وعنيه حمرا مستطيله وعلي راسه زي اللي بيلبسوه الفراعنه زمان ده وكله حاجه فيه أبيض ما عدا عنيه.

المهم الصوره دي تظهر وتختفي ولما تختفي انا شايف الغرفة كويس وأبويا وأمي بيتحركوا ف الصاله وكده عادي أجي اتحرك مش عارف زي متكون في حاجه مثبتاني فمكاني ومش عارف ارفع دراعي حتي شوية وبعد مكانت الصوره دي بتروح وتختفي ظهرت وفضلت ثابته وابتديت اسمع صوت بيتكلم وبيقول متقاومش هلبسك غصب عنك متحاولش تقاوم .

اصرخ ولا في صوت بيطلع مني ولا عارف اتحرك من على السرير ولا أي حاجه ولا حتي عارف أنادي علي اي حد مع اني شايفهم اللي ف البيت بيتحركوا وصاحيين.

المهم افتكرت اقرأ آية الكرسي ابتديت اقرأ وأنا مرعوب من جوايا أصلا والصوره ابتدت تختفي والصوت يقل فابتديت اهدي شويه واجي أقلل ف القرايه تيجي الصوره تاني والصوت يجي ويبتدي يقول نفس الكلام زي ميكون بيزعق فيا ومش عايزني اقرأ ابتديت احس انه ضعيف قدام قرايتي ابتديت ازود ف القرايه وهو يعلي في صوته ويظهر ويختفي وفجأة زي مايكون كنت بموت وفجأة رد فيا الروح تاني زي متكون بتغرق تحت الميه وتعافر لحد متعرف تاخد نفس وعرفت اتحرك كل اللي فاكره بعد كده اني اخدت نفسي ونمت متعرفش بقي غيبوبه دي ولا ايه قعد 3 ايام خايف اقرب من حد او اسلم علي حد لكون اتلبست فعلا وخايف اأذي حد من اللي حوليا .

بقلم : رفعت - مصر